شادی کے بعد دو تین سال تک اولاد نہ ہو تو تقریباً اکثریت جوڑوں اور انکے گھروں میں یہ نارمل ہی ہے۔ اس کے بعد فکر شروع ہوتی ہے۔ حالیہ دس سالوں میں مرد و خواتین میں Infertility کے کیسز بہت زیادہ بڑھے ہیں۔ تقریباً ہر دسواں جوڑا قدرتی طور پر یا دواؤں کی مدد کے بغیر والدین نہیں بن پا رہا۔ جسکی کئئ وجوہات ہیں وہ پھر کسی دن لکھوں گا۔ اور ہمارے دیہاتی کلچر میں سمجھا یہ جاتا ہے کہ مسئلہ لڑکی میں ہوگا تو اسکے الٹرا ساؤنڈ وغیرہ شروع ہوتے ہیں۔ ساتھ گائنی ڈاکٹر کوئی دوا لکھ دیتی ہے جو حمل ٹھہرنے میں ممد ہو۔ چھ ماہ سال مزید گزرنے پر بھی کوئی خوش خبری نہ ملے تو ڈاکٹر صاحبہ خاوند مزید پڑھیے کا ٹیسٹ بھی کرانے کا کہتی ہیں۔ عموماً وہ شروع بھی کہہ دیتی ہیں کہ خاوند کا بھی Semen Analysis کرا کے رپورٹ ساتھ لائیں۔ خاوند کی اگر رپورٹ ٹھیک ہو یعنی سپرم کاؤنٹ حمل ٹھہرنے کے لیے مناسب ہو تو خاتون کو ٹیوبز کا ٹیسٹ ریکمنڈ کیا جاتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔
اگر اس سے بھی کوئی بات سمجھ نہ آئے تو ڈاکٹر ڈائگناسٹک لیپرو سکوپی کا مشورہ دیتی ہیں۔ لیپرو سکوپ آپ نے سنا ہی ہوگا ایک کیمرہ ہوتا ہے جو اندرونی نظام کی ویڈیو یا تصویر بنانے کے لیے آپریشن تھیٹر میں استعمال ہوتا ہے۔ جس جگہ کوئی مسئلہ ہو وہاں ایک سینٹی میٹر کا کٹ لگا کر اسے اندر بھیجا جاتا ہے اور اسکا کیمرہ و لائٹ اندرونی نظام کو نہ صرف دکھاتا ہے بلکہ جتنا مرضی زوم بھی کر کے مسئلے کی نشاندھی کر سکتے ہیں۔ اگر تو دوران تشخیص کوئی ایسا مسئلہ نظر آئے جیسے ٹیوبز میں بلاکیج ہے تو وہی ڈائگناسٹک لیپرو سکوپی سرجیکل لیپرو سکوپی میں بدل کر ٹیوبز کو کھولنے کی کوشش کی جاتی ہے۔ بچہ دانی میں کوئی اور چیز ہو تو اسے بھی اسی سرجری سے ٹھیک کیا جا سکتا ہے۔ پیٹ پر ایک سینٹی میٹر کا کٹ ہی رہے گا۔ ماضی میں بڑا آپریشن کرکے یہ عمل کیا جاتا تھا۔
۔۔۔۔۔۔۔۔۔۔۔۔۔۔۔۔۔۔۔
ایسے جوڑے جو دوا کھانے سے بھی والدین نہیں بن پا رہے۔ وہ اپنا سیمن انیلسز اور لیپرو سکوپی کرا سکتے ہیں۔ مرد کا ٹیسٹ کو کم خرچ ہے۔ اور خواتین کا یہ لیپرو سکوپی ہسپتال اور ڈاکٹر کی قابلیت کے اعتبار سے 50 ہزار سے 1 لاکھ روپے تک ہوتا ہے۔ اس میں مریضہ کو انستھیزیا کا ڈاکٹر مکمل بے ہوش کرتا ہے۔ اور بے ہوشی میں ہی یہ عمل آپریشن تھیٹر میں کیا جاتا ہے۔ یہ ایسے ہی ہے جیسے دل کی نالیوں کا ٹیسٹ اینجیو گرافی ہے اور جس نالی میں بلاکیج وغیرہ ہو تو اسی وقت وہ انجیو پلاسٹی بن جاتی ہے اور سٹنٹ ڈال دیا جاتا ہے۔
۔۔۔۔۔۔۔۔۔۔۔۔۔۔۔۔۔۔
عمران خان کے دور میں یہ دونوں ٹیسٹ ہیلتھ کارڈ پر بلکل فری کر دیے گئے تھے۔ اب آپ اینجیو گرافی کرائیں یا لیپرو سکوپی آپ کو اس کا 30 فیصد خود دینا ہوگا۔ باقی حکومت ادا کرے گی۔ ایک ایورج ہسپتال میں یہ لیپرو سکوپی ٹیسٹ 50 ہزار کا ہے اور تقریباً 15 ہزار مریض ادا کرتا ہے۔ اکثریت کو تو اس ٹیسٹ کا علم ہی نہیں ہوتا نہ چھوٹے شہروں میں بیٹھی ہیلتھ ورکرز اور گائنی ڈاکٹر یہ بتاتی ہیں۔ سوچا آپ کے علم میں اضافہ کر دوں۔
۔۔۔۔۔۔۔۔۔۔۔۔۔۔۔۔
ایسے جوڑے جو والدین بننے کی کوشش میں ایک لمبے عرصے سے ہیں۔ وہ اپنے شہر میں کسی بھی اچھے ہسپتال سے یہ ٹیسٹ کرا سکتے ہیں۔ اس سے کافی حد تک علم ہوجاتا ہے کہ مسئلہ اگر لڑکی میں ہے تو وہ قابل علاج ہے یا نہیں۔ اور علاج کی درست سمت کا تعین بھی ہوجاتا ہے۔ ورنہ لوگوں کو دس بیس سال تک دوائیاں کھاتے، دم درود کراتے، منتیں مانگتے اور حکیموں کے پاس جاتے دیکھتا ہوں۔ پوچھنے پر معلوم ہوتا ہے کہ انہوں نے بس الٹرا ساؤنڈ ہی کرائے ہیں اور ڈاکٹر کہتی ہے دونوں میاں بیوی ٹھیک ہیں اللہ کی طرف سے ہی دیر ہے۔ حالانکہ ایک الٹرا ساؤنڈ میں یہ بات ہر گز نہیں بتائی جا سکتی کہ اندر سب کچھ بلکل ٹھیک ہے۔ اور نہ ہی سیمن انیلسز کرائے بغیر خاوند یہ کلیم کر سکتا ہے میں بلکل ٹھیک ہوں۔
تحریر:خطیب احمد

تے فیدہ کی ؟

ایسے نہیں ہوتا کہ کسی لکھاری کو کسی بھی دن کوئی نامعلوم اچانک پھینٹ دے یا غائب کر دے۔ ایسے گھٹیا کام صرف نان سٹیٹ ایکٹرز کرتے ہیں۔ سٹیٹ ایکٹرز کا یہ وطیرہ ہرگز نہیں۔ ان کا اپنا معیار، انداز اور مقام ہے۔

سٹیٹ ایکٹرز آپ کو بذریعہ کال یا ایس ایم ایس مطلع کرتے ہیں کہ “سر جی فی زمانہ جس جرات مندی سے آپ لکھتے اور بولتے ہیں کبھی کبھی تو ڈر سالگتا ہے کہ آپ کو کیوں ڈر نہیں لگتا۔ آپ اس ملک کا سرمایہ ہیں سر۔ بس لکھتے وقت آج کل ذرا احتیاط کرلیا کریں۔ اس ملک میں بڑے بڑے جنگلی گھوم رہے ہیں۔ کچھ پتہ نہیں کون کیا سمجھ کے کیا کر ڈالے۔ بہرحال اللہ تعالی آپ کو مزید پڑھیے حفظ وامان میں رکھے۔”

جب آپ ہمت کر کے پوچھتے ہیں کہ آپ کی تعریف؟ بس جی میرا نام اے زیڈ سلیم ہے، ایک سرکاری محکمے میں ملازم ہوں۔ اب اجازت۔ اللہ حافظ۔۔

اگر آپ نے اس گفتگو کو محض ایک عام سے فین کے جذبات سمجھ لیا تو آپ کی قسمت۔ کچھ عرصے بعد آپ کے کسی افسانے، سفر نامے، کالم یا بلاگ کو پکڑ کے سوشل میڈیا پر اچانک ایک دھڑم دھکیل مہم نمودار ہوگی۔ ضمیر فروش، ملک دشمن، بیرونی ایجنٹ، صیہون لابی کا کتا، لبرل فاشسٹ، کرائے کا لکھاری، یہ دیکھیے لال دائرے میں افغان ایجنٹ سے خفیہ طور پرملتے ہوئے۔ یہ دیکھیے ایک مغربی سفارتخانے کی شراب و شباب کی محفل میں بے غیرتی سے ہنستے ہوئے (لال دائرے میں)۔

مطلب یہ کہ اب بھی وقت ہے نادان سنبھل جا اور اپنے قلم کو لگام دے لے۔ پھر بھی اگر آپ بے وقوفی کی حد تک دلیر ہیں تو غضب ناک گھوڑے کے سموں سے نکلنے والی چنگاریوں کے لیے تیار رہیں۔ نامعلوم یا اجنبی نمبروں سے کالز کا سلسلہ ۔ آپ ہیلو ہیلو کرتے رہیں اورآگے سے کوئی نہ بولے، تھوڑی دیر بعد کال کٹ جائے اور پھر گھنٹی بجے اور پھر خاموشی کا ٹارچر شروع ہوجائے۔

یا پھر کوئی ایسی کال آئے “آپ کل دوپہر ڈیفنس فیز ایٹ کی سٹریٹ 48 میں دو بجکر 35 منٹ پر مکان نمبر اے 35 سے نکلتے دیکھے گئے۔ ایسے نہ گھوما کریں۔ آپ آج بچے کو سکول لینے 10 منٹ لیٹ کیوں ہوگئے تھے خیریت؟”

اگر آپ اب بھی سدھرنے پر آمادہ نہیں تو یا تو پاگل ہیں یا پھر منیر نیازی کے عاشق “کجھ سانوں مرن دا شوق وی سی”۔

اس ڈھٹائی پر کہ جسے آپ حق و باطل کے اصولوں اورآزادیِ اظہار کی جنگ سمجھ رہے ہیں۔ اگلے مرحلے میں آپ کو “اس کی سجا جرور ملے گی بروبر ملے گی”۔

ہو سکتا ہے آپ کا کوئی ایک تحریری یا زبانی فقرہ سیاق و سباق سے الگ کر کے توہینِ مذہب کے دائرے میں داخل کر دیاجائے تاکہ آپ روپوشی یا بیرونِ ملک ہجرت میں انتخاب کرسکیں۔ ہو سکتا ہے آپ کو کوئی موٹر سائیکل سوار یا پیدلیا یا کوئی بھوت ناقابلِ برداشت جسمانی نقصان پہنچا دے۔ ہو سکتا ہے آپ ہوا میں غائب ہو جائیں اور چند دن بعد اچھے بچے بن کر لوٹ آئیں یا پھر ہو سکتا ہے آپ کو۔۔۔۔۔
یعنی کچھ بھی ہو سکتا ہے۔

اس لیے خیریت چاہتے ہیں تو پہلی اتفاقی، مہذب، تعریفی، دوستانہ وارننگ کو غنیمت جانیں اور کسی بھی ایسی منڈلی کا حصہ بن جائیں جو “دیساں دا راجہ میرے بابل دا پیارا” گاتے بجاتے گزر رہی ہو۔

پھر بھی اگر حق سچ کا کیڑا کلبلانے پر بضد ہو تو اس کا رخ کسی یتیم تھانیدار، لینڈ مافیا، بدعنوان ٹھیکیدار، جمہوریت وغیرہ کی طرف موڑ دیں، کسی سیاستداں کے پیچھے لگا دیں، شہر میں گندگی کے ڈھیروں پر نظم یا نثر لکھنے پر مامور کر دیں وغیرہ وغیرہ

کیا فائدہ ایسے حساس موضوعات پر قلمی تلوار بازی کا کہ جو سادے یا مد والے الف یا ف وغیرہ سے شروع ہوتے ہوں۔ بقول بابا عبیر ابوذری

جھاڑُو نال بناون مور تے فیدہ کی
بُوتھی ہو جائے ہور دی ہور تے فیدہ کی
پَھڑ کے اندر دَین دھسوڑ تے فیدہ کی
پچھوں کردا پھراں ٹکور تے فیدہ کی
۔۔۔۔۔۔۔۔۔۔۔۔۔
تحریر: سید مہدی بخاری

***سٹیو جابز کی گیدڑ سنگھی***
سٹیو جابز کے بارے میں کون نہیں جانتا؟ ہم جس موجود دنیا میں بس رہے ہیں، اس پر اسی کے فنگر پرنٹس لگے ہوئے ہیں. جابز کی کہانی بھی رب کائنات کے رازوں میں سے ایک راز ہے اور اس کی قدرت کا پرتو ہے. ایک ایسا ان چاہا بچہ جسے اس کے والدین نے عسرت کے مارے، جان چھڑا کر کسی اور کے حوالے کردیا ہو. اور وہ اپنی عمر کی دوسری دہائی میں ملینئیر بن جاتا ہے اور تیس سال کی عمر تک ارب پتی ہو جاتا ہے.
سٹیو جابز ایک سنکی اور بدمزاج شخص تھا اور کم ہی لوگوں کے ساتھ اس کی کیمسٹری بنتی تھی. تیس سال کی عمر میں وہ اپنی ہی کمپنی سے فائر ہوا، پھر اس کی ناکامیوں کی لمبی مزید پڑھیے قطار یے. ایپل لیزا، میکنٹوش ٹی وی، ایپل تھری، پاور میک... ایک وقت آیا کہ سونے کو ہاتھ لگاتا اور وہ مٹی ہوجاتا. پھر پچاس سال کی عمر میں اس کے دن پھرے اور وہ ایپل میں واپس آیا. اب مٹی کو ہاتھ لگاتا اور وہ سونا ہوجاتا. آج یہ دنیا کی سب بڑی کمپنی اور پہلی کمپنی جس نے ٹریلین ڈالرز کا ہدف عبور کیا.
جابز کا ایک پرانا انٹرویو کچھ عرصہ سے گردش میں ہے جس میں وہ کامیابی کے سب سے قیمتی راز کے بارے میں بتاتا ہے. وہ سیدھے لفظوں میں یہ کہتا ہے کہ یہ ایک چیز کامیاب اور ناکام لوگوں میں سب سے بڑا فرق ڈال دیتی ہے. اس کی گیدڑ سنگھی بہت سادہ سی ہے اور وہ ہے "ایکشن". سوچو، اور کر گزرو.
جابز جب بارہ سال کا تھا تو اس نے فون ڈائریکٹری سے ایچ پی کمپنی کے ارب پتی بانی بل ہیولٹ کا نمبر ڈھونڈا تھا اور اسے فون کرکے فریکوینسی کاونٹر کے پارٹس مانگ لیے تھے. ارب پتی بل نے ہنستے ہوئے نہ صرف پارٹس بچے کو بھیج دیئے بلکہ گرمی کی چھٹیوں میں اسے ایچ پی میں فریکوئنسی کاوئنٹر کے اسمبلی پلانٹ میں کام بھی دے دیا.
جابز کی گیدڑ سنگھی بڑی سادہ سی ہے. وہ کہتا ہے کہ ٪90 سے زائد لوگ "نہ" برداشت نہیں کر سکتے. وہ فون نہیں ملاتے، ای میل نہیں کرتے، دروازہ نہیں کھٹکھٹاتے، نوکری کی درخواست نہیں دیتے، اپنی پسند کی لڑکی یا لڑکے کا نمبر نہیں لیتے، کیوں کہ وہ انکار ہوجانے سے ڈرتے ہیں. جب تک تم ناکامی سے جپھی ڈالنے کے لئے تیار نہیں ہوگے، کامیابی حاصل نہیں ہوگی. اٹھو، چلو، بھاگو، حرکت میں آؤ. گرنے اور ایسی تیسی کرانے کے لئے تیار رہو. اگر کوئی بزنس کر رہے ہو اور پہل کاری سے ڈرتے ہو، تو کچھ اور کرو، کیوں کہ بزنس کمزور مثانے کے شخص کا کام نہیں ہے ..... بس "کرو" بندہ درکار ہے.
آپ کے ارد گرد موجود ہر شخص جو آپ کو اپنے سے زیادہ کامیاب لگتا ہے، زیادہ بہتر صحت میں ہے، امارت میں ہے، رشتوں میں ہے، حسن اخلاق میں ہے، اس کی کامیابی کا سب سے بڑا راز ایک ہی ہے اور وہ ہے، پہل کاری. ایکشن لینا، عملی قدم اٹھا لینے والے بندے کو کوئی نہیں روک سکتا کیونکہ وہ ذہنی طور پر تماشہ بننے کے لئے تیار ہوتا ہے. یاد رکھیں جو بندہ خود کو تماشہ بنانے کے لیے تیار ہوجائے، اس کو پورا جہان بھی تماشہ نہیں بنا سکتا. خوف ایک نفسیاتی چیز ہے اور وہ اسی وقت تک آپ کو بس میں رکھتا ہے جب تک آپ اس سے پنجہ آزمائی نہیں کرلیتے. خوف کا جن، آنکھوں میں آنکھیں ڈالنے کے بعد ہی بوتل میں بند ہوتا ہے.
کیا آپ آج وہ کرنے کے لیے تیار ہیں جس کا سوچ کر سہم جاتے ہیں؟
عارف انیس
مصنف کی کتاب "صبح بخیر زندگی" سے اقتباس